मन्त्रीको अध्यक्षतामा बैठक, उपत्यकाका मेयरहरुले गरे वहिष्कार

Khabar24Nepal Author Logo..
खबर२४ नेपाल पढ्न लाग्ने समय : २ मिनेट

माघ २४, काठमाडौं । काठमाडौं उपत्यका विकास प्राधिकरणले बोलाएको एक बैठकलाई उपत्यका मेयरहरुले वहिष्कार गरेका छन् ।

सहरी विकास मन्त्रालय अन्तर्गतको उपत्यका विकास प्राधिकरणले बुधवार बोलाएको एक बैठकलाई काठमाडौं, भक्तपुर र ललितपुरका मेयरहरुले वहिष्कार गरेका हुन् ।

काठमाडौं उपत्यका विकास प्राधिकरण खारेजीको माग गर्र्दै आएका उनीहरुले सहरी विकास मन्त्री गोकुल बाँस्कोटाले अध्यक्षता गरेको भौतिक विकास समितिको बैठक वहिष्कार गरेका हुन् ।

काठमाडौं महानगरपालिका, ललितपुर महानगरपालिका, भक्तपुर नगरपालिका, चाँगुनारायण नगरपालिका, सूर्यविनायक नगरपालिका लगायतका नागरपालिकाका प्रमुखहरुले बैठक वहिष्कार गरेका हुन् ।

बैठकमा तारकेश्वर नगरपालिकाका प्रमुख भने सहभागी भएका थिए । उनले मेयर फोरमको विरोधका बाबजुद आफू भने कार्यक्रममा सहभागी भएको जानकारी दिए । ‘उपत्यका विकास प्राधिकरण खारेजी गर्नुपर्छ भन्ने विषयमा मेरोपनि सहमति रहेको छ’ मेयर रामेश्वर बोहराले भने,‘तर पनि आफ्ना केही कुरा राख्नका लागि म बैठकमा सहभागी भएको हुँ । अन्य कोही पनि मेयर बैठकमा सहभागी हुनुभएन ।’

उपत्यका नगरपालिका फोरमले काठमाडौं उपत्यका विकास प्राधिकरण खारेज गर्न माग गर्दै आएको छ । केही समय अघि ललितपुरमा बसेको फोरम बैठकले स्थानीय सरकारको काम, कर्तव्य र अधिकारमा पटक—पटक हस्तक्षेप गरेको निष्कर्ष निकाल्दै प्राधिकरण खारेजीको माग गरेको थियो ।

पछिल्लोसमय काठमाडौं महानगरपालिका र प्राधिकरणबीच भवन निर्माण मापदण्डका विषयमा आरोप–प्रत्यारोप समेत चलेको थियो ।

प्राधिरकणले आफ्नो मापदण्डविपरित महानगरले छुट्टै मापदण्ड बनाएको आरोप लगाउँदै आएको छ। महानगरले प्राधिकरणले आफ्नो अधिकारमा हस्तक्षेप गरेको बताउँदै आएको छ।

प्रतिक्रिया दिनुहोस